Helgi nú búinn að vera í fríi í rúma viku. Líklega ástæðan fyrir því að ég hef ekkert bloggað í tæpa viku.... Hann er nefnilega alltaf í tölvunni, maður kemst bara ekki að! Sést t.d. á því hversu duglegur hann er búinn að vera að blogga undanfarið.
Í gær fórum við að skoða líkamsræktarstöð sem er hérna rétt hjá. Ég er að spá í að kaupa mér kort - réttara sagt eiginlega búin að ákveða að kaupa mér kort þar. Helgi hefur frábæra æfingaaðstöðu uppi á spítala þannig að hann heldur áfram að nota hana. Ég er nú bara orðin frekar spennt að byrja að æfa aftur... mér finnst svo rosalega gaman að fara í góða spinningtíma eða body pump og svoleiðis.
Í kvöld er stefnan sett heim til Sunnu. Hún á afmæli á morgunn og er búin að bjóða stelpunum heim í stelpulegt kaffi og stelpulegar veitingar. Ég mun því setjast á hjólið í kvöld í sparígallanum og bruna yfir í Älvsjö. Helgi og Fannar fá því að strákast í kvöld.
Fannar var svoooo duglegur í gærkvöldi... Málið er að við höfum þurft að vera hjá honum þar til hann sofnar þar sem hann er svo myrkfælinn en í gær var hann alveg til í að prófa sjálfur. Við fórum saman yfir ákveðin öryggisatriði... eins og t.d. að enginn kæmist nú inn um kattalúguna hans Felix (nema bara Felix) og að ég myndi passa húsið niðri en Símon og Týra (bangsarnir hans) myndu passa hann uppi. Þegar hann var búinn að velta þessu öllu fyrir sér þá fannst honum hann vera öruggur og var alveg til í að fara einn að sofa. S.s. litli strákurinn okkar stóð sig eins og hetja í gær og finnst okkur þetta vera mjög stórt skref hjá honum. Svo var hann náttúrulega gífurlega stoltur af þessu og lét pabba sinn vita af þessu um leið og hann vaknaði.